現時最火熱的概念，非電動車莫屬，Tesla固然係宇宙最強，在美上市的理想汽車及蔚來都升爆，在本港上市的車股比亞迪（1211）、吉利（175）及長城汽車（2333），都係挾着電動車概念而破頂。
近日市場已轉炒電動車相關股，凡跟Tesla有關的，無論是零件還是服務供應，都可升到你唔信，本周有媒體報道，世紀聯合（1959）旗下的二手車服務，同Tesla將合作，周二曾爆升逾倍，最後升幅收窄跟住停牌，收市後發通告確認真有此事，昨天復牌都升兩成；欄友唐牛在去年底提及力勁科技（558），指公司係Tesla內地壓鑄機的供應商，唔夠半個月升了一倍。
本港的Tesla概念股已相繼爆升，要再搵新名字就要下點苦工，億和（838）去年年報竟然搵到Tesla呢個字。億和早年係一隻低調而穩重的工業股，近年主業辦公室自動化業務，因Canon及HP唔掂而大受打擊，盈利由2015年的2億元跌至2019年的5100萬，去年上半年仲錄得虧損。青冰之所以說穩重，因億和無論好景或逆境，份業務報告都好用心解釋公司發展，次次業績都30頁；說低調，就是Tesla這幾隻字，在業績內只係輕描淡寫幾句，成為了Tesla在海外廠房的模具供應商，計劃日後加深與Tesla中國的業務關係，就係得兩句，但在現時火熱的電動車狂潮，就變得字字值千金。
億和上周發了一個正面的盈警，預料去年度虧損1,500至2,200萬，不過他們半年業績時係蝕緊6,600萬，換言之下半年就賺返4,000幾萬，在9至11月，老細連番增持，入市價係0.47至0.51元，足證老細對業務復蘇有信心，至於能否跟Tesla在中國有合作，留意日後股價有否忽然爆升吧。
青冰