「仆你個街！咁就唔會傳染咩！」花農被玩謝，成擔心機血汗，港府一聲令下，年宵花市被迫收檔，幾百萬盆花焗入屋邨唔怕播毒嗎？
市民開車買花唔犯法，但預咗接限聚令唔見五千銀。買賣雙方有人戴黃口罩抗疫，穿黃背心棟篤企埋一邊，隨時告埋你非法集結。黃色犯硬桃花劫，生眼挑針的法官判令，取代被失業的車公靈籤。（廟外露宿者，是否車公本尊？）
港府豪擲千億保就業、益腦細，庫房的錢任擲，屁股唔使問責開花的港官，降旨包起全港花市的存貨，唔使二億，平過極之樣衰那條底褲口罩。將門常開打造成桃花陣，煲底見花，市民餓到湧去大棠折樹枝打卡，上大帽山捱凍睇結唔成的霜，無非都係太悶嘛。煲底見到桃花陣、蘭花園，超時空到毛管戙，像極了變態的愛情！仆你個街，桃花園又真係靚過水馬陣。化行妝的鄭月娥冇得去花市「買過年禮品送給我一直關心的修女」做騷，在大紅大紫的桃花陣中錄影，好配合咁擼起衣袖給習大大拜年，祝願習爺花開富貴，永續的百年黨慶發大財，桃花依舊，笑Trump風。條片剛好拍到八秒，風水佬指，代表佢唔會消失，直到2027。