武漢肺炎疫情打擊全球經濟，球壇亦不能倖免，冬季轉會窗開咗成個禮拜都冇乜重磅轉會，反而自由身市場可能仲吸引！其中前日本國腳、球壇浪人本田圭佑再有新搞作，喺上月底離開巴西球會保地花高後，近日去咗葡萄牙南部城市波爾蒂芒，即將要征戰佢職業生涯第八個國家，加盟葡超嘅樸迪莫倫斯。
本田圭佑自2017年夏天離開AC米蘭，話就話離開咗歐洲主流聯賽，但近年就搞作多多，好似冇離開過球迷視野。佢先喺2018年宣佈擔任柬埔寨教練，前年仲帶隊嚟過大球場踢世盃外，好在當時港隊喺近6,500名球迷支持同抗爭聲之下，以2:0贏到柬埔寨。唔知係咪當時港人嘅呼喊成功打動本田，舊年6月北京政府硬推港版國安法，日本一度有傳拒跟美英發聯合聲明批評中國，本田亦立即質疑日本政府點解要犧牲港人民主，最終日本喺外界壓力下，亦終於表示對港版國安法「深感遺憾」。
呢位咁支持港人嘅球星，我哋《蘋果》梗係要緊貼佢最新嘅動向喇！本報日本波專家薰爵就發現，舊年12月同巴甲球隊保地花高解咗約嘅本田，禮拜二就喺日本節目大爆自己正身處葡萄牙：「我𠵱家喺一個叫波爾蒂芒嘅地方，我到葡萄牙嗰陣接受咗武肺檢測，係陰性㗎！所以我可自由外出。」
本田所講嘅波爾蒂芒，正係好鍾意買日本球員嘅葡超球隊樸迪莫倫斯所屬嘅城市，日本國腳中島翔哉加盟波圖前，就踢過呢間球會，上季樸迪莫倫斯亦有安西幸輝、權田修一同西村拓真效力，啱啱佢哋亦成功從柏雷素爾簽入日本國腳中村航輔，𠵱家踢緊港超理文嘅中村祐人，11年前亦踢過呢間球會。所以本田圭佑最終亦大方承認：「我係收到佢哋嘅邀請，先嚟到葡萄牙，不過我仲有啲傷，可能要到月底先會傾吓，用咩方式加盟。」樸迪莫倫斯目前喺葡超排尾二，去到都唔係hea踢，要幫球會爭取護級，挑戰性相當大。
如果本田所講嘅說話真係成事，樸迪莫倫斯就會成為佢聯業生涯踏足嘅第8個國家、效力嘅第9間球會（見附表）。2004年喺名古屋八鯨展開職業生涯嘅本田，出國搵食嘅首站係2008年去咗荷蘭嘅芬洛，之後被俄超球會莫斯科中央陸軍招攬踢過歐聯，2014年加盟AC米蘭。本田離開米蘭後就開始足球浪人生涯，三年半入面不停遊飛機河，去過墨西哥踢帕丘卡、澳洲踢墨爾本勝利、返去荷蘭踢維迪斯同上季去咗巴西踢保地花高，每隊都效力唔多過一季，唔知樸迪莫倫斯會唔會係本田職業生涯最後一站呢？
