英超家陣每2個星期就會為20間球會嘅職球員進行病毒檢測，最新一輪嘅兩次檢測入面雖然確診數字較上星期回落，但係仍然有36宗陽性個案，反映球壇疫情明顯仍然嚴峻。近期英國球壇有唔少賽事都因為疫情改期進行，目前已經有五場英超比賽因為參賽球會爆發武漢肺炎而要延期，最近一場就係阿士東維拉主場鬥熱刺。呢場比賽原定今日喺維拉主場嘅維拉公園球場進行，但係主隊足足有10位一隊球員染疫，最終賽事宣佈取消，熱刺星期三就改為主場鬥富咸。維拉上周末英足盃鬥利物浦嗰場賽事入面（圖），已經要由U23同U18嘅青訓入面揀啲球員落場比賽，今次英超比賽更加要改期舉行。聖誕同新年假期間有唔少球員被揭發違反防疫規例搞派對，所以英政府都要出面督促各賽會要以更強硬手法確保所有人遵守防疫條例。