閱讀以下文章前，八方先忠告各位讀者，由於涉事相片相當「重口味」，除非大家好似著名財經專欄作家渾水一樣，「懂得」欣賞新民黨葉劉姐姐「美腿」，知道讚吓呢條腿可以造福社群，否則都係齋睇文就好，不妨skip幅相。
話說特首林鄭月娥噚日朝現身行會前記者會其間，除咗特別澄清葉劉「姐姐」近日有關不容許BNO持有人擁有雙重國籍嘅主張，其實從來無喺行會討論過之外，亦疑似喺衣着上向姐姐採取「反制」措施，喺大家今朝因寒冷天氣凍到震騰騰之際，林鄭竟然着咗一條喺步行其間，會露出半隻大髀嘅及膝裙現身，仲要配上一對高踭長靴，唔少在場傳媒睇到，都即時增添幾分「寒意」；莫非林鄭喺葉劉步步進迫下，唔想再比姐姐「專美」？
李八方