23歲代表甚麼？一般而言就是剛大學畢業，投身社會的年紀。若以球圈的說法，23歲就是脫離梯隊，正式進入成年賽層面的一年，可算是「成人禮」。「成年」的一年，徐宏傑的23歲沒有踢過一場正式比賽，他笑言自己黑仔，但深信「做好自己，機會自然會到」。
記者/攝影：禤家民
部份圖片由受訪者提供
先簡單說一下徐宏傑的2020年。1月開始隨中甲梅州客家季前集訓，包括在泰國的訓練營，踢過幾場友賽，也與梅州續約，之後因疫情提早返回中國，中甲亦因疫情延遲展開。還記得當時梅州外援多利確診，傑仔與眾隊友須隔離，小記問其情況，他當時指政府安排了預防的中藥予他們服用。
5月，傑仔突然被梅州交易到富力，港超聯9月復賽，傑仔又不合上陣資格，10月新季展開，富力季前散班，傑仔11月與理文簽約，完成註冊的那個星期，港超聯再度停擺。換言之，傑仔在2020年，他23歲的那一年，沒有踢過一場正式比賽。
手機用戶請按此放大圖表
傑仔是流浪近年最出色的青訓產品，三年前被梅州客家相中，北上轉戰中甲。當時年僅21歲的傑仔與梅州簽約五年，似乎是梅州重點培訓球員。他在梅州亦表現不俗，相信不少球迷都看過他狂奔半場「熱血護空門」那條經典片段吧。（傑仔還有另一「熱血提場」片段，也是經典。）
在中甲兩個球季，傑仔踢了三十多場比賽，去年初續約後，與梅州到2024年才完約，誰也想不到，梅州在中甲開季前選擇放棄培訓了兩年的傑仔，與富力交換梁諾恆，傑仔說：「一開始都愕然，係無奈多啲，啱啱續完約，冇心理準備會走，估唔到咁快會想交換。」雖與梅州仍有合約在身，但球會對於交換球員一事，事前沒有與傑仔討論：「冇傾，直接同我講，咁我都唔會say no嘅，始終夾硬留喺度都冇意思。」
失望、無奈過後，傑仔很快調整心態，「後尾諗深一層，都冇乜特別，諗住返嚟可以多啲時間陪屋企人。另外都可以再沉澱吓，爭番啲出場機會，之後再算。」也許是因為獨自在梅州生活時培養出的性格，經歷磨練，傑仔沒有因一時的失意而變得意志消沉，「中甲成個足球環境、聯賽水平都比香港高、更專業、比賽高強度、節奏好快。人都會成熟啲，好多嘢要自己做，陌生環境下，思想會更成熟。」
同是港腳級後衞，傑仔被梁諾恆搶走在梅州的席位，外界難免會將兩人作比較，但傑仔自己反而沒有，「一來位置唔同，好難比較；二來球隊可能需要佢（梁諾恆）呢類中堅啩，佢亦證明到自己踢得OK，冇乜特別。」最近梁諾恆更轉投另一中甲球隊浙江綠城，有指轉會費為1,000萬人民幣（約1,200萬港元），更有傳綠城實際要付出2,000萬人民幣收購。
傑仔在流浪出身，回港前亦曾與流浪總監李輝立溝通，「佢話去富力都OK吖，始終係大球會，有機會爭亞洲賽。佢嘅意見都重要，始終佢喺球圈咁多年。」儘管23歲就回流港超聯並非傑仔計劃之中，但他回港後一直努力操練，球場關閉就跑步健身，球場重開就等待比賽，港超聯9月復賽，才發現條例所限，他只能做「陪練員」，「有啲意外，當係畀多少少時間同球隊磨合，都係兩個禮拜，點知完咗球季，富力就散班。」
當時已經是10月，傑仔亦已等了10個月，沒有在正式比賽上陣過，「好突然，無奈囉，都準備好晒，點知又冇得踢。呢一年都阻滯多，唔止係我啦，好多人都係。」新季即將展開，一眾富力兵即要找新東家，傑仔算是較幸運，不愁沒有球會賞識，但仍要解決與富力的合約問題，「叫做接受咗佢賠償，我只係想快啲落場比賽。」理文在11月28日宣佈傑仔加盟，但需時註冊，12月的首個星期，傑仔完成註冊後，港超聯亦隨即停擺，「可能真係我問題，太過黑仔。」幸好傑仔還懂得自嘲。
運動員生涯短暫，停擺一年，影響不小，更何況是正值成長期的傑仔，「呢一年叫做有啲浪費咗，一年冇比賽，進步會慢，甚至停。但另一方面心態成熟咗，經過咁耐冇比賽，有比賽時會更加珍惜。」只是不知何時何日，球迷才有機會看到傑仔上場比賽。
富力散班後，傑仔是最受關注的球員，他亦承認當時有幾間球會主動聯絡，他最終選擇理文，「都要時間考慮，揀理文主要原因係入面有球員好熟，鄭兆均、余沛康同余煒廉等等，青年軍教練羅sir（羅國豪）都喺度；二來好欣賞陳sir（陳曉明）嘅足球理念，一直想同佢合作、學習，理文畀我感覺亦有野心，想同佢哋一齊攞好成績。」傑仔與理文簽約兩年，目標是助理文取得亞洲賽席位，「聽盧均宜講，亞協對手相對偏弱，亞冠就真係學嘢，差距好大。希望逐步逐步，先踢亞協，如果有機會踢亞冠就當然好。」理文今年能否出戰亞協盃仍有待亞洲足協確認，說不定今年傑仔就可以首戰亞洲賽。
傑仔已定下在理文的長遠目標，沒有再特別去想再次外流，因為他認為做好當前的工作才是最重要，「可能真係有外流機會先再諗，家陣想快啲幫理文比賽，拎好成績、拎亞洲賽資格。最主要係喺香港踢好啲先，踢得好先有人睇到。我唔會話一定要返上去，可能踢得好嘅時候，就有其他機會嚟到。」
23歲的傑仔諸事不順，逆境下幸有摯愛支持，「想多謝屋企人同女朋友，呢一年冇咁順利，多謝佢哋一直支持我。」24歲的傑仔仍在等待，等待球場重開，再次在香港球迷面前比賽。訪問時傑仔說得最多的是「冇乜特別」這四個字，外來因素控制不了，就不要太介懷，盡力做好能力範圍內的事，練好體能，當可以再次比賽時有最充足的準備，是徐宏傑對足球的態度。
