姑勿論中移動（941）會否繼續炒到飛起，但兩個交易日可以有百幾億北水淨買入一隻股票，買到接近已發行股本2%，睇個款想食晒美資持股，亦足證北水依然惡到不得了，至少反映呢一刻港股未去到需要擔心嘅時候。
恒指守住5天線再突破28000關口，上星期當炒板塊明顯調整，例如光伏股，而上星期處於整固嘅板塊就炒上，如PD-1生科股、家電股。踏入1月，資金流向比之前更強，輪動升市周轉會加速，即使揸實受歡迎板塊股份遇上調整，整固三幾日估計又再破頂。
隨住恒指破頂，雖然噚日成交不如之前兩日，但市旺日子預料保持2,000億以上日均成交，港交所（388）企穩5天線有權再升，之前提過券商股造好，暫時預計會繼續衝。至於耀才（1428）盈喜後未能裂口高開，於是股價急回，觀乎港交所整固近完成，跟港股升合理不過，耀才由高位整固已逾一成，同樣撈得過。
美滙弱勢固然有利股市，就連傳統貴金屬價格亦強勢，過去江銅（358）持續盈利能力相對其他貴金屬股份強，近期股價走勢似乎最強，較為可取，至於落後啲嘅鞍鋼（347）已經整固期間成交逐步縮，亦相信好快炒下一轉。
晉佳