左丁山在1月7日早上四時起床睇波，AC米蘭對祖雲達斯，未轉台之前，CNN畫面直播美國華盛頓國會山莊被示威者包圍、衝擊、佔領，大吃一驚，乜美國都會有呢啲事情發生？當時係美國時間1月6日下午三時，所有外國電視都有直播，於是唔睇波咯，坐響梳化猛咁轉台，只見CNN主持人大罵特朗普點解唔採取行動平亂，係唔係在白宮睇緊電視直播，要求特朗普立即向全國發表電視演說，呼籲浸粉退出國會山莊，BBC就冇咁衝動，比較述而不論，霍士電視呢？現場記者就呼叫：「警察在那裏Where’s the police?」
跟住候任總統拜登首先出現，發表短暫演講，要求當權者（即係特朗普囉）即時平亂局。隔咗幾分鐘，特朗普發表錄音發言嘞，第一句就係對衝入國會山莊嘅浸粉講嘅：「我明白你哋嘅悲痛，我應該贏得嘅選舉，但被人偷走咗。現在請你哋回家，和平地回家去吧。」然後（事發後三小時）派出國民警衛軍到現場驅趕，拘捕侵粉，華盛頓市長宣佈晚上六時宵禁（香港早上七時），宵禁開始前，示威者走晒，國會在晚上8時恢復確認選舉人票程序，一路通宵開會到1月7日凌晨三點幾先至完畢，確認下任總統係拜登。
美國國會雖受暴力衝擊，但憲法制度受得起考驗，有共和黨議員提出動議，反對拜登當選，以大比數被否決，不少共和黨議員與民主黨議員聯手擊敗共和黨之特朗普支持者；原先特朗普大力向副總統彭斯施壓，要彭斯運用議長權力，撤銷喬治亞、賓夕凡尼亞、阿里桑拿、威斯康辛等州份嘅選舉人票，但四年來對特朗普忠心耿耿，言聽計從嘅彭斯，在最後關頭發表聲明，他本人無權單方面否決任何選舉人票，違反選民的意願，只能依照慣例，完成確認選舉人票之程序。據說特朗普因此大怒，大罵彭斯冇勇氣，彭斯多年老友奧克拉荷馬州參議員James Inhofe亦是投票畀特朗普嘅，佢話未見過彭斯對特朗普咁非常憤怒，一世人未試過咁嬲，堅持效忠憲法。特朗普恨連任恨到發燒，到最後一分鐘忽然明知輸梗，仍要反撲，卒之弄出一個大頭佛，現已成為美國政壇罪人，眾叛親離！本來佢一早認輸，2024年尚可捲土重來，今則臨尾香，政治生命完了。