呢排法國菜啱我胃口，上星期推介俾大家嘅里昂「大」，同雷恩踢成2:2，相信各位都滿意。今個周中有法國超級盃，由上季1、2哥巴黎聖日耳門（PSG、圖）同馬賽交手，初步PSG開到讓一球/球半，都幾辣吓，順住法國波開「大」原則，預計有「入球大細」中位數[2.5/3球]，一於繼續追「大」。
呢啲國內超級盃，好似英格蘭社區盾咁，一般都係安排喺季初，俾國內聯賽同盃賽冠軍交手，叫做炒旺開季氣氛，不過因為武肺，法國呢場波就搞到1月先舉行，因為PSG係國內三冠王，所以對手就搵上季亞軍馬賽，場波就喺朗斯踢，大家都冇主場之利。
去到季中先踢超級盃都算有啲好處，事關雙方都冇季初病，攻勢入肉好多。PSG歇冬前換教練，普捷天奴新官上任，2場波1勝1和，都唔算好突出，前線尼馬仍然受傷，不過有迪馬利亞、基利安麥巴比都算夠殺。可惜PSG後防唔多穩陣，近6場作客5場有失波，對摩納哥都失三球，今次對馬賽唔易保清白身。始終今仗屬國家打吡，馬賽唔會放鬆。歇冬後2場馬賽都係1勝1和，中場皮耶都算老馬有火。馬賽季初聯賽作客PSG就贏1:0，今場波都唔會一味死守，鬥攻下入球「大」可以追。
冷門方面，就選擇荷甲前列大戰，燕豪芬主場對阿爾克馬爾（AZ）；燕豪芬上仗榜首大戰，表面就係2:2畀阿積士逼和，其實佢哋下半場全面受壓，唔俾對手反cup真係有多少運，不過球員消耗就好大；AZ已經五場不敗，休息時間又比對手多一日，作客有權搶分。
文：Goal進
截稿前馬會尚未開盤，盤口僅供參考，讀者記得留意足智彩網頁。
