今屆英足盃其中一場最矚目嘅比賽，由英格蘭第八級別球隊馬連（Marine A.F.C.）喺禮拜日主場迎戰英超勁旅熱刺，2軍嘅聯賽排名足足相差161位，係英足盃史上最懸殊嘅比賽，最終業餘隊馬連雖然吞足五隻光蛋出局，但賽後一眾球員獲熱刺送波衫之餘，球會亦賣到超過三萬張網上波飛，疫情下閉門作賽反而勁賺30萬鎊（約320萬港元）！
喺1894年已經成立、目前位於北部超聯第一組西北嘅馬連賽前備受外界關注，雖然佢哋大部份都唔係全職踢波，好似球隊隊長兼前鋒甘明斯係一名體育老師，但佢哋之前幾經辛苦贏咗七場波，先入到第三圈抽中對熱刺，賽前更獲同市嘅利物浦同愛華頓兩間英超球會借出訓練場地，同寄埋錄影片段幫馬連備戰！
不過馬連只係低組別球隊，佢哋嘅主場設施比較簡陋，搞到熱刺要用宴會廳作為臨時更衣室，場邊亦冇教練席區域，而且球場相當近民居，唔少馬連球迷甚至附近嘅居民，都喺鐵絲網外睇波，有球迷帶埋利物浦領隊高普嘅紙板現身，亦有女球迷一邊飲酒一邊睇波呢！
講返場波，賽前揚言會尊重對手嘅熱刺領隊摩連奴今仗半力出擊，雖然上半場早段畀對手翼鋒簡尼禁區外勁射中楣嚇一跳，之後熱刺中場迪利阿里又唔知特登定唔小心無端端碌地，畀場邊嘅隊友孫興民等人笑，加里夫巴利甚至做出要畀牌嘅手勢警告阿里插水，場面非常搞笑。不過慢慢上力嘅熱刺展示出英超級數，結果憑巴西前鋒卡路士雲尼斯奧斯大演「帽子戲法」，加上盧卡斯莫拉嘅入波半場領先4:0，下半場再有後備上陣嘅16歲小將迪維尼埋齋，成為熱刺最年輕入球者，結果熱刺以5:0大勝輕鬆晉級。
雖然馬連慘敗出局，不過球會都因為場波獲益唔少，雖然武肺令兩隊賽後冇得交換波衫，不過唔少馬連球員賽後都喺網上炫耀，話自己收到熱刺球星波衫，仲話今場係一生人最難忘嘅時刻！至於球會賽前喺網上賣出30,697張虛擬門票，以每張10英鎊去計算，單單網上門票已經令馬連勁賺30萬鎊，名副其實名利雙收！反而做咗善舉嘅熱刺就收到一個唔太愉快嘅消息，佢哋周三英超嘅對手，將由阿士東維拉改為富咸。
