參加民間初選等同「開車打劫」，玩謝經紀，如何向打算買車的大叔解釋，開車唔會被差佬焗控「打攬十步曲」？市道艱難，經紀拍心口擔保，架Tesla係藍色㗎嘛，咁重本點會揸去攬炒。「架車俾人淋咗黃油，又點先？」車主問。「泊喺停車場被淋油，咁暴力，差佬實查CCTV，唔會屈你。」車主反問：「停車場裝假狗，冇鏡頭，影唔到消失的八秒，永遠搵唔到真相，又點先。」經紀唯有善意提點：「咁就認罪囉。」車主彈起：「你係咪篤灰先？」經紀解釋「開車打劫」根本不可行，「開槍打劫就話啫，開車？架車唔係武器。」車主反駁：「後生仔行行吓街被追，跑得慢被搜出背囊有支雷射筆，有支自拍神棍，被控藏有非法用途物品，法官判社會服務令但律政司上訴改判七個月監禁。開車出街，要坐幾多個月先？」經紀答應，萬一車主遭還押荔枝角，會帶盒羅漢齋飯去探他。
車主放蛇至此，安心騷肌，眼都唔眨：「吔飯有罪！車載四個人送飯盒，有意圖犯聚！依家拉你！跟党走！听党話！」