余生於60年代，童年最鍾意粵語長片，但成人世界好多嘢唔明。例如古裝片甚多情節係咁的：奸角石堅捉咗個師妹後，一定飲杯酒，淫笑攬住佢，女的拚命掙扎，然後鏡頭一轉，影吓行雷又或者流水，之後師妹哭哭啼啼的同曹達華講：「師兄，我俾個衰人汚辱咗，冇面見你啦。」跟手唔係跳海自殺，就係冇幾耐生個仔。
那年頭我六歲，想極唔明，點解石堅只係摸過個女人塊面，女主角就會大肚，一定仲有啲嘢。「污辱」到底係乜東東，真是耐人尋味。於是乎走去問阿嫲。佢大吃一驚，話你條塞豆窿有書唔讀，好學唔學，以後唔准睇戲。好多電影有毒，尤其係武俠片，打打殺殺，兒童不宜。
俾阿嫲罵咗一餐後，我唔敢再問人。其間，我趁佢拜神唔為意，偷咗神枱上杯燒酒飲咗一啖。嘩，難飲過貓尿，衰過汽水千百倍，真係唔明石堅點解要飲咗燒酒才撲埋個女人度，為甚麽唔飲綠寶橙汁？
那時有份新聞紙叫《成報》，大人買咗我無所事事又攞嚟睇吓。此報副刊甚多言情小說，內容十分鹹濕，但繾綣那部份卻又寫到唔湯唔水，唔清唔楚。究其原因，是60年代報紙佬全部為知識分子，國學根基紮實，只因搵兩餐而寫這類俗品嘢，故經常借意露一手，妙筆生花，舞文弄墨，形容詞及成語多過乜，甚麽「祿山之爪」、「酥胸半露」、「軟溫新剝雞頭肉」、「雲雨巫山」……但那一男一女到底搞甚麽大龍鳳，過程如何，始終冇詳細說明。唯一知道，是成年人喜歡睇女人個胸。
當年家居新蒲崗，附近有啟德遊樂場，遊樂場內戲院門外有個箱，入咗兩毫子後窗口會打開，觀眾可看三分鐘。有一回一名麻甩大叔入了錢，我在旁非常好奇，眼甘甘。見咁情况，佢大發善心，讓我免費看一眼。啋，原來係冇着衫嘅女人照片，有乜好睇。兩毫子咁貴，可買兩條雪條，扺過看兩隻奶。
70年代初電檢放寬，狄龍國際發行鹹濕西片《輪上春》，影片於樂聲及新聲戲院上映，轟動全港。同年，邵氏上映何夢華導演，邱剛健編劇之《毒女》，脫星陳萍艷照天天見報，引人入勝。余之小學同學「炸雞」生得牛高馬大，蠱惑多計，佢竟能掹衫尾混入戲院，事後更在校內繪影繪聲，話男歡女愛實情係咁咁咁。於是我等初哥茅塞頓開，如夢初醒，開始對成人電影產生興趣。
撰文：區紹熙
本欄逢周二刊出
超級戲迷，嬉笑怒罵品評新片。漫步影壇細說從頭。著有《港產片真巴閉》一書。
