「精神啲，臨時演員都係演員嚟！」 熟悉對白來自《喜劇之王》主人翁尹天仇，正確來說，其實是仙人求，因為周星馳（星爺）戲中扮演的茄喱啡尹天仇，原型正是仙人求。仙人求是個對演戲充滿熱誠的臨時演員，他喜歡研究戲劇大師史坦尼斯拉夫斯基著作《演員自我修養》，也被星爺搬上《喜劇之王》，可惜仙人求因未能百分百時間投入拍攝而激怒星爺，未能在星爺光環下走上演藝高峯。仙人求只嘆一切時也命也，只好認命。
撰文：戴彩煥
仙人求的真名吳劍華（Silas），現年65歲的他，小二已被睇中當路人甲，當臨時演員一當便30多年，他對演戲總是落足全力，這夥熱誠更打動了周星馳，當年星爺開拍《喜劇之王》前，花了一小時單獨約仙人求見面。
仙人求說：「佢同我interview嗰陣，我將我睇嗰本史坦尼斯拉夫斯基嗰本書……（忽然偷笑）秘密啦，我唔係成本書睇晒，我以我所知一輪嘴同佢講成個鐘唔停。」當日跟星爺討論做戲層次和內心戲演繹方法，仙人求就搬出史坦尼斯拉夫斯基一套：「係由外到內，再到外，即係外邊環境自己去感受，跟住自己消化咗之後，用自己諗法去發揮出嚟，而唔好距離劇本太遠，譬如做江湖大盜，叫你去搶錢，你好似借錢咁咪唔得囉，你要真係去搶。」
那次見面後，星爺跟仙人求簽訂了一份既非演員也非顧問的合約，總之開工期間仙人求要隨傳隨到，某些場口，星爺會叫仙人求試做一次，自己從旁觀察模仿。尹天仇好些對白，則是從仙人求口中套出來，整部戲有三分一場口，他都有份參與。回想當日跟星爺日夕相對，仙人求仍然興奮雀躍：「我日日眼瞓都唔瞓，開心吖嘛！」
星爺還在拍攝現場介紹張栢芝給仙人求認識，叫栢芝劇本上有不明之處可向仙人求請教，令他受寵若驚。眾所周知，星爺脾氣大，仙人求笑言也見識過，卻撐他是藝術家脾氣。說來也奇怪，星爺一向喜歡加插不同小人物在電影之中，這些小人物在星爺光環下往往人氣提升，何以仙人求冇份？僅在《喜劇之王》一幕跳舞場面過鏡？ 仙人求扁扁嘴，自揭因為激嬲星爺：「當其時就算幫佢，我重點都係喺電視台度，電視台一嚟通告，我問過李力持導演，佢話放我過去拍，點知我去咗拍嘅時候，另一個打畀我：『星爺要你即刻返嚟。』我話唔得喎，我已經拍緊喎，之後佢（星爺）覺得我唔夠全心百分之一百時間畀晒佢，所以其他嘢唔敢預我囉。」
據仙人求所知，《喜》結尾原本有幕爆炸場面，他有份飾演一個小角色：「我去咗長洲拍嘢，佢（星爺）搵人話有個角色畀我，我點返到過嚟做啫？個角色係喺尾部份佢送外賣，捉晒啲賊仔，如果我喺度，會炸到好過癮嗰隻囉。冇辦法，時也命也！」
至於多年來，可曾遇過又擺款又看不起他的藝人？仙人求講起明顯仍耿耿於懷：「有啲人唔方便講佢個名，只係話抵佢後尾輸咗幾千萬，有次演藝人協會聚會，我埋到去握吓手，理都唔理、望都唔望，咁我咪算囉！後尾聽聞佢輸咗幾千萬嗰啲『kill哩more』（其實想講accumulator）啲基金，令到我都唔想再聽佢唱嘅歌，面口仲慘過同佢借錢。 」