香港立法會喺民主派總辭之後，議政質素屢創新低，靠佢哋把關完全得啖笑。之前民主派仲喺議會之時，建制派無所不用其極逼迫對家，包括提出處分行為極不檢點議員，仲度埋一堆罰則，結果等到對家走晒，佢哋終於喺議事規則委員會傾，不過建制派成日講要嚟罰泛民議員嘅「辣招」，好似成日話向違規議員罰款、停職扣人工等，原來係做唔到！
八方聽聞，立法會秘書處按議員要求研究過海外做法之後，議事規則委員會就計劃參考英國國會下議院機制，即係違規議員要停職一段時間，如有重犯，停職期會增加。
如果係咁，議員唔使開會返工又有糧出，咪好似益咗建制想罰嘅民主派議員？本來建制議員一早打晒開口牌，話要對行為極不檢點、多次犯規議員出「紅牌」停佢哋職兼罰錢扣人工，不過講就易，做就好難，原來因為咁做要由法庭頒令，立法會根本冇相關法定權力扣議員人工，所以建議應該未能落實。其實呢個說法根本嘥氣，立法會主席當日夠冇權剪布啦，結果用萬能的《議事規則》第92條，由主席決定咪得囉，就咁就得咗！而且現時立法會已經同人大會議冇咩分別，個個變橡皮圖章，仲點會有人「違規」呢？
李八方