好多人話2021年香港人要面對沉重一年，今日唔知聽日事，只能抓緊當下。新一年到臨冇耐，政權就炮製一場民主派大圍捕，用國安法顛覆國家政權拉晒所有參加初選嘅候選人，包括年紀輕輕已投身香港社運嘅民主派荃灣區議員岑敖暉。但佢獲釋後短短幾日就傳嚟喜訊，話岑敖暉決定同女朋友拉埋天窗，近日正式入紙排期註冊。
即將成為岑太嘅就係曾任Now新聞台女主播余思朗（Nicole），其實有行家早知兩人戀情，有Lester嘅朋友同社運圈中人都知兩人蜜運中，不過因為知道佢哋兩個想將戀情低調處理，所以冇人爆響口，而Lester因曾參加立法會初選，上星期被捕，當日好多行家同佢兩個嘅朋友都戥Nicole擔心，後來見Lester成功保釋，好多行家扑咪後都估Lester會唔會盡快向女友求婚呢？到噚日佢兩人嘅擬結婚通知書曝光，知道佢哋已正式入紙排期註冊，大家都替佢哋高興。
根據婚姻註冊處貼出嘅擬結婚通知書，Nicole細Lester幾個月，兩人同樣27歲，報住同一地址。八方就上述消息向Lester查詢，佢話唔回應，似乎唔想婚事太高調。無論如何，相信好多香港人都會祝呢對新人喺亂流下幸福平安。
李八方