前日本國腳三浦知良老而彌堅！雖然呢位日本「國寶」到下個月就到佢54歲生日，但心入面對足球團火從未熄滅！禮拜一佢效力嘅日職球會FC橫濱喺官網宣佈，已經同三浦知良續簽咗一年新約，將會同球隊一齊征戰預計喺2月尾展開嘅2021年日職新球季。
呢位不老傳奇喺1986年喺巴西山度士出道，當年佢只有19歲，Kazu話：「我同FC橫濱簽咗新合約喇！上季最衰都係疫情，搞到全世界都陷入艱難時期，我真係好想多謝各界人士嘅幫助，令我哋可以返到球場踢波。我覺得自己仲踢得掂，雖然上季冇乜機會上陣，但我對足球嘅熱情同期望仍然提升緊，今季我會踢更加多嘅比賽，為球隊嘅勝利作出貢獻，我會每日都努力練習，去實現呢一個目標。」
Kazu上季跟住FC橫濱，事隔12年重返日職，雖然佢上季只係上陣咗4場聯賽同2場盃賽，兼且連續三季食白果，不過佢依然成功打破咗日聯盃同日職最年長嘅上陣紀錄，相信三浦知良只要保持年輕嘅心態，同埋心入面嗰團火，今年仲有機會繼續刷新呢堆紀錄嘅！
