AC米蘭上周中意甲俾祖雲斯打破佢哋今季嘅不敗金身，好彩嘅係仲保得住自己嘅榜首位置。上星期六佢哋再征戰意甲賽事，主場迎戰下游球隊拖連奴就即刻迎嚟反彈。
上半場25分鐘，巴謙戴亞斯接應傳送之後彈前，拉菲爾利亞奧殺入禁區起腳破網，為AC米蘭射成1:0。11分鐘之後，巴謙戴亞斯喺右路發難直闖禁區，俾回防嘅拖連奴隊長比洛迪侵犯跌低。球證喺翻睇VAR之後，判咗12碼畀AC米蘭，由基斯爾操刀一射破網，米蘭半場領先2:0返更衣室。
去到50分鐘，拖連奴前鋒施蒙尼華迪喺兩個AC米蘭守將夾擊之下喺禁區跌低，球證當時就直指12碼點，但VAR其後介入推翻判決。之後拖連奴都有唔少攻勢，但係就冇辦法取得入球。
AC米蘭喺完場前五分鐘，就換入咗休戰七個禮拜、佢哋嘅精神領袖伊巴謙莫域（小圖），不過戰果就冇改變到，AC米蘭最終贏2:0完場。米蘭目前17戰積40分，同市死敵國際米蘭星期日作客羅馬，俾主隊嘅基安盧卡文仙尼喺86分鐘入波逼和2:2，痛失2分之下家陣以3分落後AC米蘭續排第2位。