近期西班牙受到風暴侵襲，令首都馬德里連日嚟都有大雪，除咗令到畢爾包作客馬德里體育會要延期外，要作客奧沙辛拿嘅皇家馬德里，仲足足要困喺飛機入面五粒鐘，雖然最後場波都要照踢，但係皇馬雪戰下只可以0:0悶和奧沙。令皇馬雪上加霜嘅，係巴塞隆拿輕鬆四球大勝CF格蘭納達，同佢哋嘅距離拉近到得番三分咋。
由於畢爾包受大雪影響冇辦法到達馬德里，所以西甲賽會決定將場聯賽延期，不過順利出發去潘普洛納嘅皇馬就冇咁好彩，作客奧沙一戰要焗住踢。雖然比賽順利上演，不過因為球場出現積雪，令兩隊表現都大受影響，皇馬全場雖然佔盡優勢，但係最終只係拎得一分。踢完比賽嘅皇馬仲要因為大雪關係，冇辦法即時返馬德里要滯留酒店。
眼見馬體會場波有得延期，皇馬就面對大雪頂硬上，所以教練施丹賽後扯晒火，鬧爆賽會安排失當：「可以做嘅我哋都做晒，不過呢場根本唔係踢波，場地狀況實在太惡劣喇。近兩日發生嘅事好複雜，我哋都唔知幾時可以返去（馬德里）。對奧沙辛拿呢場波其實應該延期，我哋同對手一樣希望有個理想嘅比賽環境，但現場好明顯唔符合呢個要求喇。」
有人歡喜有人愁，另一邊同樣係作客嘅巴塞就靠美斯同基沙文起孖，四球大炒格蘭納達，升上西甲第三位之餘，同皇馬之間嘅距離得番三分。今場有兩球進賬嘅基沙文，終結咗自己持續咗八場嘅西甲入球荒，狀態似乎開始回升。但係講到踏入2021年之後狀態最好嘅，就當然係今場同樣梅開二度嘅球王美斯，新一年佢入咗四球外，今場亦打破咗長達六個月嘅罰球入球荒，令自己嘅罰球入波數字超越咗基斯坦奴朗拿度（C朗）。
今場美斯先喺禁區邊左腳勁射破網，之後又喺禁區頂射入罰球。喺呢場比賽前，美斯對上63次主射罰球都未入過，再上一次罰球入波，已經係上年7月對陣奧沙辛拿。呢球係美斯球會生涯嘅第48個罰球入波，已經超越咗C朗嘅47球，美斯仲要平均16.6場就入1球，效率高過C朗嘅18.5場。
另外，美斯今場亦都創造另一個偉大紀錄，佢自06/07球季開始連續15季喺聯賽入球數字上雙，係史上第一位球員達成呢個壯舉，所以就算美斯已經33歲，對巴塞嘅影響依然相當大，都難怪球會點都唔希望佢離隊喇！
