接唔少樓按生意的黃馮律師樓被接管，可憐苦主寒風下要頻撲處理。據聞，收風最快的金管大人已經下達黃馮苦主投訴「清零」目標，難怪多間銀行積極伸出援手。
疑似有前員工虧空公款以及律師樓賬目不清，導致律師會作出不得已的決定，飭令黃馮律師樓停業，接管並凍結所有資產。資金託管在律師樓本應令人放心，但到頭來，原來只是大家將一切看睇太理想當然。
據講無法庭手令前，律師樓資金只能被鎖，筆者睇完《蘋果日報》及《壹週刊》報道提及的幾位苦主，真是沒有最慘只有更慘。有些個案已支付大訂，在律師樓託管的釐印、首期被鎖，更甚是銀行已批出的幾百萬貸款都被鎖，認真無辜。
苦主要解決核心問題，律師會似乎幫不了忙，據聞有人向銀公、金管求助。實話實說，今次「過失」本與負責放款的銀行無關，銀行大可置之不理，甚至隨時可直接向債仔追收貸款。
不過，金管又點可能蹺埋雙手唔理呢？最近江湖傳聞金管局下令苦主投訴要「清零」，而銀行態度亦相當積極，已聯絡受影響客戶，稱會盡力協助客戶所需，雪中送炭比趕盡殺絕高招，處理得好，銀行貸款變壞賬機率驟降，助客戶度過難關，甚至能達宣傳之效，或者可以中和凍結政客、取消名人戶口等負面新聞。
講咗成篇黃馮苦主。又update下虛銀情況啦！早前富融銀行宣佈，開戶人數已突破1萬人，8間虛銀正式投入運作，會為銀行業帶來乜嘢新局面？現階段只能拭目以待。
杜夫人