人大常委譚耀宗促香港司法機構不要以精英自居，又成日掛在口邊：「中國係一個法治國家。講中國法律制度、法治等等等，聽「夫子」劉銳紹講就精采得多咯，劉夫子在文匯報工作多年，八九六四前係駐北京記者，研究報導中國新聞40年以上，又有大量內地人脈關係，知道內地法制係乜嘢一回事。中國的法律，有好多寫得好周密、嚴謹，讀法律條文，令人讚嘆，可以在世界上對西方國家講，你有乜，我都有，中國是法治國家。
只不過，香港，歐美日本等國家，冇「黨大還是法大」呢個概念。左丁山聽劉夫子講過，中共打倒四人幫後，前人大委員長彭真得到平反，彭真痛定思痛，提出討論黨大還是法大，點知冇人敢睬佢，後來鄧小平不提不討論，黨大還是法大呢個焦點就一如香港八萬五咁，董先生說：「唔講好耐咯」，就此打住。在黨中央集一切大權之體制下，黨大當然無可置疑，講法大只是書獃子想奪權，反中央之議論。
彭真之後，冇人再敢講黨大還是法大，所以中國之依法治國純屬存乎一心；民間一般事情，商業糾紛，不涉及黨國利益者，就是依法行事，凡傷及黨國利益，妄議中央，不知敬畏，不接受新聞言論控制等等，就以黨政策行事，先行懲治，再找一條法律送犯事者入監倉，例如尋釁滋事對付維權人士，公民記者，以經濟犯罪（貪污、挪用公款）加諸商人身上，總之一定搵到一條來入罪。
政治凌駕法律，乃中國法律制度之精要，有人不服，可搵劉銳紹辯論。最近12港人坐船逃亡，被中國公安捕獲，在深圳判刑，有無律師代表呀？有兩位內地律師居然有勇氣舉手，接受家屬委託為辯護律師。官司打完，12人一如所料，輸了，都預咗嘅啦，但兩位內地律師盧思位及任全牛幾日後就收到所屬省份司法廳通知，擬吊銷律師執業執照，理由係佢哋曾在網上發表「不當言論」，2018時為「邪教組織」辯護行為違反規定等等。
咁都得，問內地律師怕未，譚耀宗當然會話中國依法行事，其實中國讀法律嘅學生畢業後，考律師執業試難度極高，非讀書精英莫辦，考到之後乖乖地在北上廣深一線城市做商業律師，肯定成為中產人士，做刑事辯護律師必然冒上政治風險，但仍然有律師奮起為弱者維權，被釘牌或入獄，令人敬佩。