冇咗民主派議員嘅立法會，建制派議政質素有幾好，唔使八方講市民都有目共睹，但冇咗民主派議員之後，暴露咗民建聯班議員，原來咁多年嚟連開財委會嘅程序都唔知，仲要出聲鬧，搞到要財委會主席陳健波和立法會秘書處話畀佢聽開會審議程序係點，真係羞家。
話說立法會財委會上星期五先後審議280億公帑嘅三項政府撥款項目，雖然財委會主席陳健波講明，三個項目冇議員要求分開表決或者討論，點知表決到第二項撥款，梁志祥走去同黨友周浩鼎、柯創盛、黃定光密斟、黃仲同佢講：「點解會係咁？唔知幾時搞到咁？」、「你（梁）快啲問吓秘書處究竟發生咗乜嘢事？」
於是梁問陳健波，點解冇得喺會上面再問問題？呢個時候陳健波話，如果想喺財委會再討論，要先喺工務小組提出將個撥款項目分開表決。
呢個時候梁志祥仲唔醒水，再質疑冇寫明分開表決就等於財委會官員都唔使嚟喎！呢個時候陳健波再解釋，如果議員要求官員解畫，可以喺財會舉行前一日通知秘書處，但秘書處冇收到通知喎！點知梁仲唔收口，話以佢「理解」，嚟到財會應該仲有討論機會，呢個時候陳健波叫立會秘書再解釋個程序一次，梁志祥先如夢初醒，點頭示意明白。
有民主派人士同八方講，由於以往民主派議員成日要求撥款分開表決，令建制派乜都唔理，以為老馮有官員出席，𠵱家冇民主派做呢樣嘢，就立即暴露呢班人原來乜都唔識，真係齋坐喺度等出糧。
李八方