國安警大規模拘捕民主派初選候選人後，各個被捕人士都已經成功保釋，事隔幾日好多香港人都好關心佢哋嘅狀況，不過唔係個個保釋咗之後有接受傳媒訪問，好似網名「李伯盧」、曾提倡「三投三不投」的政治素人吳政亨（圖）咁，佢就用另一方式向支持者報平安，就係直接喺連登開po。
「李伯盧」當日被捕，好多連登巴打好關心佢安危，但似乎冇乜傳媒喺佢保釋後搵到佢，佢兩日前喺連登討論出post報平安，話自己已經保釋，仲提醒大家睇路，以往同今後同佢私訊嘅人，都應該視之為「公開資訊」。點解？單單喺去年6月至11月，就係3,721部被捕人士手機撿取後「被閱覽」，大家真係要小心資訊安全喇。
除咗「李伯盧」，曾參加九龍西初選的印度裔社工安德里（Jeffrey Andrews），噚日亦喺facebook發帖報平安，感謝太太、父親、妹妹，及外界關心同支持，佢仲話發現全家都係「超級英雄」，形容太太喺「女超人」，當Andrew被鎖上手銬一刻，太太如同一位勇士，絲毫沒有展示軟弱，而爸爸就係「Iron Man」，因為聽到佢被捕消息後，不但無因此嚇倒，反而叫Andrew放心，並且會為佢祈禱。
面對「顛覆國家」咁大罪名，人民力量前立法會議員陳志全就一切如常，繼續去咗將軍澳尚德邨企足成粒鐘派口罩至於初選，唔少市民上前為慢必打氣，鼓勵佢喺逆風中前行。
李八方