【本報訊】「香港人冇理由唔識廣東話！」商人吳嘉嶸與太太在家堅持用廣東話溝通，不過他們三名就讀國際學校的子女連跟長輩用廣東話溝通也有困難。有感於身為香港人，下一代最基本要識廣東話，他夥拍本地著名漫畫家鄺彬強出版首本粵語正字港漫《消失的12守護》，冀望能培養新一代學廣東話的興趣。
記者：羅惠儀
「唔知大家有冇發現，有啲我哋細個聽過長輩講嘅詞語，𠵱家少用少講，我哋嘅小朋友連聽都未聽過？」吳嘉嶸在漫畫前言中說。他舉了一個活生生的例子：「有次女兒和我鬥嘴，結果當然係唔夠我講，我當時就講：仲死雞撐飯蓋。結果又係不問可知，佢根本唔知你講乜。」有感於此，身為三個孩子的港爸，吳嘉嶸毅然出版港漫系列，藉此保育廣東話。
吳嘉嶸在家向來用廣東話與子女溝通，數年前，發覺從小就讀國際學校的子女連對答也用英語時，嘗試亡羊補牢：「他們連用中文表達能力都弱，平時聽、認字的機會太少。我當時有跟他們用廣東話講書，卻不奏效；看漫畫算有興趣，因為少字。不過書面語跟講的又有些少不同。所以促使我想出版一套廣東話寫的漫畫，起碼先引起他們對中文字有興趣。」
吳認為，土生土長香港人始終要識講廣東話，期望子女中文達初中程度，於是想到透過漫畫先引起子女閱讀中文興趣，然後增加他們廣東話遣詞用字能力。
為粵語正字港漫《消失的12守護》繙譯及編輯的是文學博士邱健恩，他着重粵語獨有語彙，使文字更「貼地」有親切感，像漫畫內有對白「打贏你，好易啫」，他改用坊間流行用語「衣C執」（即easy job發音）。「就算我們有幾撐廣東話，一樣有不少諺語流失，像『鬼捂眼、鬼拍後尾枕、多隻香爐多隻鬼』等，小朋友未必知」。
邱健恩說，土生土長香港人已有一套共同且有共鳴的廣東話詞彙：「例如話阿媽𠵱𠵱哦哦，我唔會明白普通話嘮嘮叨叨，但用𠵱𠵱哦哦就明白，語言本身有聯繫，你一定諗起阿媽，有一個好明確嘅形象出現。」然而這代兒童怕中文，興趣遠不及英文，他冀藉此套港漫讓兒童真正認識廣東話詞彙，增加閱讀中文趣味。
邱健恩期望，兒童看圖文同時察覺原來這些就是廣東話：「如果小朋友係粵語人，都未必有足夠能力判斷邊啲係廣東話。舉例話『好容易』，究竟係廣東話定係普通話？因為語法系統係共同share，不過如果我用『衣C執』又再接近廣東話多啲。」
自本地小學中文授課語言有粵、普之分，坊間有指用普通話學習中文更能「我手寫我口」，口語更貼近書面語。邱健恩則認為，普通話口語與書面語同樣有分別：「白話文就係白話文。普通話有國家層面嘅正統地方，無可否認。不過喺語言層面上，從方言角度嚟睇，係漢語分支，唔不代表普通話講出嚟就可以寫成白話文，係有差距嘅。」他對用哪種語言授課沒意見，指兩種語言下學習中文的人，同樣有出色的文學家。
《消失的12守護》屬連載故事，預計每季推出一期。書名令人聯想到最近在內地被拘控的12港人，吳嘉嶸說兩者完全沒有關係，故事早於兩年前開始構思，純粹想出版一個兒童喜歡的冒險題材，故事內消失的「12守護」是瑞獸：「主角嘻嘻波係富二代，反而呢個我有意思，因為背景多少反映香港兒童嘅富足生活，我想透過佢嘅經歷鼓勵小朋友。」