皇家馬德里喺對上一個月順風順水，贏多和少，但似乎今周有啲黑氣纏身，事關前鋒賓施馬可能惹官非，早幾年嗰單疑以性愛影片勒索昔日法國國家隊隊友華布拿一案「陰魂不散」，法國檢察官周四向外界宣佈會再審番成單案，睇嚟有排煩。另外，教頭施丹亦瀨嘢，因為同一位武漢肺炎確診者有緊密接觸，需接受自我隔離等病毒檢測結果，唔知趕唔趕得切周六帶隊作客奧沙辛拿。
先講現年33歲嘅賓施馬，2015年捲入咗呢宗勒索案就好多人都知。當時有疑犯偷拍華布拿同佢老婆嘅性愛過程，試圖用呢條片勒索華布拿失敗後，就搵咗賓施馬做中間人，其間賓施馬疑曾勸華布拿交錢了事。事件曝光後，賓施馬當年被拘留咗一晚，隨後呢位皇馬球星更被起訴有份參與勒索，自此賓施馬亦未有再入選過法國國家隊。
兩年前法國當地法院更推翻咗賓施馬嘅上訴，延至周四，當地檢察官終於向外界宣佈，賓施馬將要再面臨審訊。根據早前報道，喺法國若勒索罪成，最高刑罰為監禁5年同罰款75,000歐元（約71萬港元），不過賓施馬嘅律師回應指：「審判賓施馬嘅決定係荒謬同唔公平，賓施馬並無任何刑責。」雖然話告唔告得入，真係冇人可以預計，但呢單案突然又有新進展，睇嚟都會影響佢心情。話晒呢位前鋒今季喺隊內仍然好重要，喺聯賽有八球進賬，亦係全隊最多嘅一位，如果佢踢唔出水準，皇馬就真係唔知搵邊個入波。
賓施馬單案仲有排審，但周六作客奧沙辛拿，最直接嘅影響就係教練施丹未必帶到隊。施丹最近同一位中武肺嘅人士同行，要接受自我隔離等病毒檢查結果。ESPN等媒體報道，施丹周四上晝已接受咗一次測試，結果為陰性，但喺西甲賽會嘅防疫政策規定下，呢位法國籍教頭必須喺另一次PCR病毒測試中錄得陰性結果先可以歸隊，所以佢冇出席到球隊周四嘅操練。不過，就算施丹成功通過最新一次病毒檢測，都要得到西甲賽會批准，先可以參加周六場波。
冇施丹領軍，皇馬就要搵副手比度尼出任臨時主帥，負責喺場邊督師，不過就算真係咁，皇馬都未必驚，事關對手今季排聯賽榜尾二，只要皇馬發揮到水準，相信要搶到三分應該都唔難。