【名家足路】
【對決場次︰西維爾vs皇家蘇斯達】
上周同燈神尊嘉對決德甲，自認好熟德國波嘅小弟竟然先輸一仗，以為RB萊比錫過冬後作客未必有料到，點知原來主場嘅史特加踢得仲亂，如果唔係門將基哥高保好身手救咗幾球，真係唔止輸一球，受讓半/一叫走咗半個盤，其實真係幾好彩，就怪我太睇高呢隊「升班馬」。
有留意呢個專欄，可能會發覺唔知點解啲燈神降班後，反而睇得清咗，贏番上月擂台一哥轉頭，所以真係風水輪流轉。點都好，我係上月一哥之外，今個月都喺擂台前列，今次同尊嘉轉玩場西甲，我睇好西維爾，大家不妨再信多我一次。
西維爾主場對排名高佢兩位嘅皇家蘇斯達，差3分但踢少對方3場波，所以主導權基本上仲喺西維爾手上。講吓兩隊走勢，西維爾自從去年12月初輸畀皇家馬德里，連同埋啲盃賽在內已經八場不敗，當中有六場係贏波；相反皇蘇方面，歇冬前係三連敗，直至返嚟呢兩場波，先至兩仗不敗，但上周主場都要同尾2嘅奧沙辛拿打成1:1，足以證明佢哋踢到嚟呢個階段已經開始乾塘，預視嚟緊只會繼續下滑，歐洲賽席位難保。呢場要作客比斯桑球場硬撼走勢正旺嘅西維爾，一分都應該保唔住。
呢場波西維爾只係少讓平/半，可以話係筍盤，而且之前有傷嘅兩位主將奧甘波斯同捷西斯拿華斯都可望復出，軍心大振。至於皇蘇除咗冇消息話大衛施華可以回歸，今場就連左閘嘅蒙利爾都上陣成疑，人腳唔齊整下受讓咁少真係好難撐，一於全力衝上盤。
文：盧卡東尼
《一燈決》係今季新欄目，由上月擂台盟主同上月燈神拗吓頸，睇吓讀者信邊個。