【《蘋果驗樓》】
【本報訊】市區居屋爭崩頭，以市價59折推售的長沙灣單幢居屋凱德苑，業主陸續入伙。本報記者隨驗樓師到屋苑中層一個約377呎的單位驗樓，發現最少六大問題。當中廚房是重災區，驗樓師發現單是廚房已有17塊空心磚，煮飯時隨時有磚塊跌落「加料」；廚房防火門更未能自動關合，一旦廚房失火，生命安全受威脅。單位近大門位置的石屎地台也出現輕微滲水，疑是門框腳罅縫未有封實，當走廊洗地時，污水可經罅縫入屋。驗樓師評單位僅僅合格，當中鋪磚、門及地台三項目更「捧蛋」。
房屋委員會2019年以市價59折推售六個全新屋苑，包括何文田冠德苑、長沙灣凱德苑、將軍澳雍明苑、荃灣尚文苑、馬鞍山錦暉苑及沙田旭禾苑，提供4,871個單位，更破紀錄收到逾30萬份申請，業主陸續收樓入伙。
其中位處市區地段的長沙灣凱德苑屬單幢設計，樓高40層，每層有21個單位，部份單位有海景，單位實用面積介乎279至522平方呎，平均呎價7,783元，最平195萬元便可「上車」。屋苑交通尚算方便，距離港鐵南昌站約10分鐘步程、長沙灣站則約15分鐘路程。不過，屋苑毗鄰聖瑪加利男女英文中小學及名校英華書院，部份中低層單位或會受學校噪音影響。
本報記者隨驗樓師賴達明到凱德苑中層一個實用面積約377呎單位驗樓，業主一家以綠表家庭申請，單位折後售價約292萬元，呎價約7,700元。該單位屬居屋常見的「開門見廁」設計，可間到一房；單位望學校，景觀尚算開揚。
賴達明驗樓後發現，單位最少有六大問題，當中以廚房屬重災區，有多達17塊空心磚，大部份更在窗邊的位置，「時間耐咗，（空心磚）會容易鬆脫剝落，邊位細塊嗰啲，比大塊仲容易跌落來……以新樓標準嚟講，17塊空心磚算係多」。
他又稱，廚房另一個更嚴重的問題是防火門未能自動關合，「廚房門屬耐火結構嘅防火門，要有自動關合嘅功能，但呢道門完全閂唔埋，萬一發生火警，呢道門係完全失效，濃煙熱力可以通過，係相當嚴重問題」。他指出，防火門未能自動關合會影響逃生安全，更不符合消防安全規格，又認為當局驗收單位時，理應發現相關問題，「呢道消防門係唔合格，驗收時無理由發現唔到」。他建議廚房門需重新安裝，或調整門鉸，以達致防火功能。
此外，賴達明亦發現單位近大門位置的石屎地台有「發黑」情況，他用「導電感應濕度」儀器，測試地板濕度，儀器顯示為25度，代表有輕微滲水，「呢啲係水迹，睇落去比較深色，見到水迹沿住牆腳一路延伸到大門位置，有成25度，一般正常情況，濕度應該係20度或以下，20度以上屬於輕微滲水迹象，相信呢個位置曾經出現滲水」。
單位大門外，門框腳呈「吊腳」現象，甚至可揳入五元硬幣，疑是門框腳罅縫未有封實，當走廊洗地時，污水可經罅縫入屋，「有條大隙出現，周邊冇膠邊或者防水膠封實，所以我懷疑之前走廊曾經洗地，啲水透過門框入咗屋」，若業主裝修時做入牆傢俬，長遠有可能因滲水發霉而報銷，更嚴重的情況是客廳地台沒有防水層，滲水有機會影響下層單位。
至於單位其他小問題，還包括有廁板鬆脫、浴室熱水爐面蓋未有安裝穩固，「你睇吓係鬆嘅」，長遠會導致熱水爐內的部件生銹，甚至增加漏電及火警風險，「沖涼時啲水氣好容易入咗去，爐入面嘅金屬部件就好容易生銹，個爐就唔耐用、好易壞」。
另外，單位亦有客廳的窗開關不暢順、未能上鎖等問題，「客廳好多窗都好污穢，抹都冇抹過。」賴達明驗樓後認為，單位評分僅54分，其中鋪磚、門及地台三項工序更「捧蛋」。
房屋署回覆稱，凱德苑單位業主入伙驗樓時，發現單位內有損壞的情況，可向入伙服務大使或屋苑管理處填交「損壞情況報告表」，如發現有關損壞事項屬質量不符合建造合約要求，房署會要求承建商跟進維修，並重新驗收，確保質量符合規定標準。
署方稱，承建商已完成有關單位的所有修繕工作，正待業主驗收。房署有嚴謹驗收制度，一般使用敲擊棒在瓷磚表面敲擊用以測試砌瓷磚工程的方法存有不確定性，敲擊發出不同的聲響並不能代表瓷磚有穩固性的問題。
