【名家足路】
【對決場次︰西維爾vs皇家蘇斯達】
上星期作為燈神嘅我向讀者推介RB萊比錫，僥倖以1:0擊敗咗自稱好熟德甲、上月一哥盧卡東尼睇好嘅史特加，為2021年打響頭炮！今個禮拜佢就話唔玩德甲喇，整場勢均力敵嘅西甲西維爾對皇家蘇斯達比拼吓。佢就話睇好主隊，不過皇蘇季初上過榜首，係一支好有韌力嘅球隊，我就睇好佢哋今場至少唔使輸，甚至有機會贏埋㖭喎！
西維爾呢隊波雖然係上屆西甲第四，但論表現其實冇乜強隊本色，今季對住奧沙辛拿、侯爾斯卡、基達菲呢啲波，全部都只係贏得一球，之前對華拉度列仲要贏唔到，劏到上盤客一頸血。無他嘅，佢哋嘅教練盧比迪古之前喺皇馬，已經證明咗自己唔係帥才，球員方面更加係一班豪門棄將。冇錯，捷西斯拿華斯、蘇索、盧克迪莊、拿傑迪錫個名就響喇，踢落又完全唔係嗰回事，老鼠拉龜嘅場面經常喺佢哋身上發生，西維爾要讓波即刻諗都唔使諗。
反而皇家蘇斯達今季異軍突起，季初一度殺上榜首，點知因為要分身歐霸盃，先搞到聯賽失分。但睇番佢哋今季輸波嘅比賽，只係輸畀巴塞隆拿、馬德里體育會呢啲傳統勁旅，唔同西維爾對住CF格蘭納達、畢爾包都輸得，表現硬淨得多。加上王牌西班牙國腳奧耶沙巴爾近期已順利復出，配合埋樸圖、巴倫尼特斯亞、阿歷山大伊沙克等後生仔，明顯比起西維爾有朝氣得多。筆者就相信佢哋今仗至少可以保持不敗，「讓球主客和」捧皇蘇[+1]喇，進取啲嘅讀者買埋下盤甚至客勝都唔錯㗎！
文：尊嘉
《一燈決》係今季新欄目，由上月擂台盟主同上月燈神拗吓頸，睇吓讀者信邊個。