Uber服務一直被指違法，遭警方多次放蛇，終審法院去年9月裁定24名司機非法載客取酬終極上訴失敗，約一個月後，Uber變招推出Uber Taxi選項服務。有律師指相關服務同屬違法，因的士理應按錶收費，「（Uber Taxi）某程度上唔係用緊的士個系統，等於一架白牌車。」
Uber Taxi與Uber私家車的車費均由系統按路程、行車時間等因素決定，乘客叫車時已知車資，並授權信用卡付款，Uber Taxi司機無需按錶收費。
律師梁永鏗解釋，的士不按錶收費，已非提供的士服務，與白牌車無異，「佢（Uber Taxi）等於一架普通車收錢，不過架車外面有的士（標誌），佢個牌係運作的士服務，唔係運作一個另類收費嘅服務」，故Uber Taxi司機已涉非法載客取酬。
記者多次放蛇乘搭Uber Taxi，有司機載客時仍會落旗起錶，梁推斷「撳錶只係令警方截查機會變細，取證較難」，此舉無改Uber Taxi沒有按錶收費的事實，一旦警方放蛇打擊，司機亦難逃法律責任。
根據《道路交通（公共服務車輛）規例》第47條，的士必須按錶收費，違者可被判罰款10,000元及監禁六個月。