特朗普離任前搞到咁大，變相為「狂人政治」趕客，直頭好似鋪紅地毯歡迎拜登咁款，亦令特朗普2024年難以捲土重來，試問日後佢如何再組班？「狂人政治」壽終正寢，中港股自然較過往4年受歡迎，亦為近日港股跑贏美股嘅原因之一。
投資者最怕變數，喺拜登上場前要避險，資金流保持有利港股，但去到大約拜登正式上任嘅日子，連最驚青嘅投資者都入市，後市反而對港股以至美股不利。呢一刻，就將1月20日定為一個分水嶺先，喺呢個日子打後開始要變得審慎。事實上，睇港股以至Bitcoin癲況，實在唔覺得可以玩到幾多日。
噚日港股調整，恒指仍然喺5天線樓上，勁過以20天線為支持嘅納指同標普500指數，但美股仍然走勢不錯。今次升浪嘅龍尾股，可能係一批走勢見轉弱嘅科技股龍頭，最強勢已經係蘋果，連日調整過後，估計短線快將能夠觸底回升，當白宮順利過渡，刺激一眾科技龍頭如Amazon向上，甚至連中美一齊打壓嘅阿里（9988）都絕地反彈嘅話，呢浪升勢隨時炒到差唔多了。半新股唞氣，電動車股未升完，光伏股更加升到停唔到，協鑫（451）升超過一成後，可留意陽光能源（757）。
晉佳