周中重心馬賽冇令大家失望，今個周末繼續推介法甲；榜首里昂（圖）越戰越勇，星期六作客另一支前列分子雷恩，勝負真係難料，但入球「大」幾好路，趁莊家未調高法甲「大細」中位數，一於再追「大」。
疫情之下，唔少聯賽風格都轉晒，意甲、德甲常「大」之外，其實法甲都唔差，今季踢到星期三，已經累積497球，平均每場入2.79球，比上季平均數足足多0.27球，增幅都幾驚人。星期六咁多場，搵番最有信心嘅里昂。里昂排喺榜首，多巴黎聖日耳門（PSG）三分，雖然冇PSG咁入得，18戰都入37球，不過防守又冇PSG咁好，所以入得又失得，真係開「大」至寶。
好似上次主場對朗斯，里昂就以3:2險勝，連續4場波總入球3球或以上，不過足智彩仲未算大幅調高法甲「大細」中位數，睇返足智彩里昂場波開盤，「大細」中位數仲有[2.5/3]，入到三球都叫開到「大」。雷恩排第四，上仗就悶和南特0:0，不過佢哋返主場攻力會好好多，9場主場有5場都攻入2球，不過防守又唔太出色，今季主場只有一場波保持清白身，星期六預咗同里昂鬥攻，入球「大」穩陣。
另一場蘭斯主場對聖伊天就推介和波。聖伊天經歷早前七連敗後，呢排做咗一分大師，上仗連巴黎聖日耳門都和到，近7場竟然和咗6場，由季初排榜首跌吓跌吓已經去到第14位。聖伊天星期六作客蘭斯，蘭斯又唔太識贏，近3仗和2場，睇怕呢場都係和味濃。
文：Goal進
截稿前馬會尚未開盤，盤口僅供參考，讀者記得留意足智彩網頁。
1.里昂是法甲作客戰績最佳球隊，自季初和波爾多0:0後，已連續8場作客有入球。
2.羅馬是意甲唯一一支主場不敗球隊，8戰6勝2和，入19球只失7球。