現年44歲的李天翔被喻為「御用奸角」，前年5月他離開效力近24年的無綫外闖，可惜拍畢王晶電影《金錢帝國2》後，就因武肺爆疫冇工開，導致一度壓力太大而失眠。猶幸他早一步到內地接受隔離，因此接了不少商演活動，又得太太支持，令他無後顧之憂，戰勝疫境。
李天翔去年拍完電影《金錢帝國2》就冇工開，他形容去年是他事業的悽慘期︰「其實離開無綫嗰刻我就預咗，但坐唔夠三個月，晶哥就搵我拍戲，算係好開心，但開心完到𠵱家，係全年冇嘢拍。我知全世界都受疫情影響，但都係嗰兩句︰有錢唔係最重要，但冇錢你都要食飯㗎嘛。」
李天翔自言疫情令他成長︰「我性格係既來之則安之，乜都唔諗，不過經歷疫情我開始長大……其實都遲，真係有危機感。」他說突然變得悲觀︰「我會諗，慘嘞！我一時有工開一時又冇，雖然太太一向好獨立，但我哋年紀又越嚟越大，唔想佢擔心我，我諗得好灰，希望我走嗰一刻可以留番筆錢畀佢。」
藝人收入不穩定，李天翔嘗試在網上做寵物零食生意，望可殺出血路。他多年前更已考獲健身教練牌︰「我𠵱家好似打游搫，嘗試行埋呢條路，開始時客唔多，但有得做就做。」
香港冇工開，去年8月李天翔趁內地有活動，逗留內地兩個多月，卻因此接了不少登台騷︰「8月時我接咗啲活動，因為香港未有工作，就索性留喺內地等機會，因為我一早隔離完，啲酒吧老闆唔使等，就手嘛！」他說現在港星返內地工作不易︰「多咗好多限制，除咗加稅問題，我都知道好多劇組寫明港、澳、台藝人盡量唔用。我就好好彩，登台冇俾人壓價。」
李天翔說在內地登台一輪後返港，再次面對零工作︰「11月喺內地返嚟又坐咗喺度，加上場館都閂埋，連健身都唔得，有幾晚down得好緊要。其實之前好矛盾，喺內地keep住有嘢做，我唔願返港，因為起碼搵到生活費，但離開太太太耐又好掛住。」
雖然事業危機重重，但李天翔慶幸太太善解人意，二人結婚三年多，未試過吵架，並且從不過問他工作的事︰「佢一句都冇問過我呢行嘅嘢，但佢應該都會驚，因為我成日都接觸女演員，但相處咗一段時間，就算我通宵至返，佢都會覺得都係份工啫。」
場地提供：富衛1881公館
撰文：祖李
