話說李大導前日又有大製作，將民主派初選嘅候選人全部拉晒返差館，動用咗成千警員，卡士就夠晒。不過李大導一埋位講對白，就錯漏百出喇，發表「揸車打劫」奇論。好多人同八方一樣聽完一頭霧水，初選同「非法手段」有咩關係呢？接着論到建制護法，全國人大常委譚耀宗噚日出席商台881晴朗，又為「非法手段」解畫，又係金句百出，講完自己都唔笑，相當有演員修養。
主持問譚，到底初選參與者用咗咩「非法手段」，譚話攬炒十部曲，「一步一步咁嚟，目的係顛覆國家政權」，所以每個環節同過程，都叫「非法手段」，主持好明顯唔多明，再追問十部曲入面邊一步係非法手段呢？譚呢個時候就爆出金句，「如果成個過程做嘅行為，最後達到一個目的，我覺得呢啲做法就係非法」，仲話即使初選係民主派內部傾吓玩吓都係唔得。
原來喺譚耀宗理解，只要做嘢「一步步」嚟，最後又達到「目的」，就可以係非常危險嘅「非法」行為。不過說穿咗，解咗兩日都解唔通嘅嘢，其實就代表初選無罪，只係有一班人屈你有罪。
「前線科技人員」facebook專頁聽完譚sir精闢分析之後，忍唔住都抽下水，出post話噚晚發夢夢見「攬炒十步」，據說只要做咗第一步，就會違反顛覆國家罪。而第一步就起身食早餐，之後去大便，點知塞咗屎渠，大便倒灌臭死咗樓上美國特工，最後引發大戰，聯軍喺天星碼頭登岸⋯⋯唔知食完早餐嘅譚耀宗，參與實施第二步時，會唔會三思喇。
李八方