港將梁諾恆上年喺港超聯嘅富力踢波嗰時，俾梅州客家睇中，獲得機會轉戰中甲。佢喺中甲嘅第1個球季一共上陣15次，並且以中堅身份攻入三球。最終球隊嗰季成功晉身衝超組，可惜只獲第五名衝超失敗。梁諾恆早前返嚟香港小休之後，已經重返中國準備新球季，而表現良好嘅梁諾恆喺今季就俾浙江綠城睇中，浙江星期四正式宣佈成功交易到梁諾恆加盟，據報轉會費更加高達1,000萬人民幣（約1,200萬港元）。
浙江上季喺衝超組以3分之差落後長春亞泰得第2，但係就喺升降班附加賽2回合計以2:3輸畀武漢卓爾，衝超失敗。今季球隊戰意鮮明，銳意捲土重來，務求再次衝超。佢哋除咗簽入梁諾恆之外，早前亦都公佈會以曾經做過巴塞隆拿青年隊教練、前青島黃海主帥佐迪維也斯擔任總教練。梁諾恆星期四完成隔離之後已經抵達咗杭州，下星期日就會隨隊去到昆明做季前集訓。