今個周末繼續推介意甲，唔少人都鍾意阿特蘭大（圖）呢隊波，貪佢哋攻力勁又失波多，就算贏唔到都開到個「大」。星期三佢哋就主場炒帕爾馬三粒，聯賽六場不敗，氣勢一時無兩，星期六作客賓尼雲圖，牌面睇就好似冇得踢，不過我就唔係咁睇嘞。
賓尼雲圖主場暫時最叻都係摸和祖雲達斯，對米蘭雙雄都輸晒，聽落好似麻麻；不過好得意，阿特蘭大作客唔係咁常開「大」，特別係家陣足智彩開到中位數開到黐晒線，呢場睇怕都有[3.5球]，真係嫌多。睇番阿特蘭大作客，近4次都係得1次有4球，就算初盤阿特蘭大讓一球，都好似有啲多。賓尼雲圖唔係冇料到，上仗作客都贏卡利亞里，今次主場應該守住先，大家可以先落下盤同入球「細」，再等走地，等到兩球左右先補番「大」，咁就靚仔晒。
星期日就有大戰，羅馬主場鬥國際米蘭。羅馬係爭標「黑馬」，開季到家輸嗰三場都係作客，主場真係穩定如山，真係冇咩挑剔；相反國際就大把嘢講，季初話自己越嚟越叻、會成為世界頭五前鋒嘅盧卡古，小弟睇佢敗家頭五就一定入，對弱隊先識踢嘅，拿達路馬天尼斯真係獨力難支，尼恩高蘭離隊後又多故仔講，干地帶隊一頭痛，作客即時輸畀森多利亞，今次又連續作客，我係干地就頭都大埋，外憂內患，2、3位之爭要隊有勢有態嘅，定要隊多多問題嘅球隊，大家清楚明白啦。初盤竟然係羅馬受讓平/半，真係有冇搞錯，下盤同「大」要晒。
文：黃耀富
截稿前馬會尚未開盤，盤口僅供參考，讀者記得留意足智彩網頁。