自從抗爭者前年7.1衝入立法會後，建制派一直要求要加強立法會保安，去年9月行管會就落實保安專家建議，喺立法會大樓一樓同二樓電梯位置，分別加裝1.8米高嘅閘機，加強出入管制，最近有關設施陸續動工，部份更已出現喺大樓入面，但有議員睇到就覺得，呢啲所謂「保安設施」令人覺得好似起緊監獄咁。
喺眾多加強立法會保安設施入面，有人咁高嘅入閘機最先搞掂，唔使四個月時間，立法會地下入口亦已經安裝好多部閘機，仲要部部個閘門都有成年男人咁高，以後仲有冇人可以跳閘、衝閘？呢個當然係唔會再出現喇，亦係行管會想達到嘅目的囉。
除咗裝新入閘機，其實行管會當時亦通過其他措施增強保安，包括將現時喺立法會外嘅水馬陣，由臨時水馬變成永久性嘅圍欄同花槽，而且已經動工，只係仲未完成。根據熱血公民議員鄭松泰提供嘅照片，可以見到圍欄同花槽工程仍在進行中，仲係一片泥地，似乎就冇咁快完工，不過鄭松泰就鬧爆呢個工程，話𠵱家嘅立法會係「興建一所監獄通過惡法」，泰博又質疑，咁樣起重重圍欄圍住立法會根本係浪費公帑。𠵱家民主派選立法會，選前會被DQ又會被人告、選到一樣可以畀政府話犯國安法告到坐監，𠵱家連立會大樓都搞到監獄咁，你話幾諷刺。
李八方