意甲爭冠繼續精采！周三榜首AC米蘭主場迎戰米蘭名宿派路帶領嘅衞冕祖雲達斯，比賽喺兩隊有球員中武肺之下繼續踢。結果祖記靠名將之後嘅費達歷高基艾沙梅開二度，以3:1力克老對手。米蘭今季意甲不敗之身被破，跨季27場聯賽不敗走勢亦結束，歐洲五大聯賽再冇不敗之師，不幸中大幸係二哥國際米蘭同日都輸波，米蘭仲保住榜首；至於祖雲達斯就喺積分榜超越埋拿玻里，努力爭取後上完成10連霸偉業。
由於國際早場1:2爆冷輸咗畀森多利亞，令米蘭無論咩比數都可以保住榜首。球迷期待嘅基斯坦奴朗拿度（C朗）鬥伊巴謙莫域就因後者繼續倦勤成空，不過今場C朗嘅風頭都俾基艾沙搶晒，呢位意大利翼鋒18分鐘就接應保羅戴巴拿靚絕後腳傳送入楔一射破網領先，雖然之後俾米蘭嘅卡拿比亞禁區頂撞射追平，不過換邊後祖記憑基艾沙左腳妙射再度領先，尾段祖記再有後備入替嘅韋斯頓麥堅尼門前建功，最終以3:1擊敗對手全取3分。本來落後10分，家下追到只係落後七分，仲要踢少一場，衞冕前景又一下子變得光明。
今場基艾沙光芒四射，總算為倒戈返聖西路作客嘅祖記主帥派路拎返唔少面子，本來開季至今派路帶隊祖記未贏過前10名球隊，但今次一贏就贏隊榜首。今場派路用基艾沙壓制對方大勇嘅左閘迪奧靴南迪斯，更被眾多外媒大讚係一記奇招。賽後派路都大讚球隊創造咗好多機會，不過佢就表示唔會關注其他球隊嘅表現，只會做好自己，「呢場波對我哋好重要，但我哋唔會關心排前面球隊嘅成績，我哋只會做好自己，再睇吓過幾個月球隊會排喺咩位置。今場最重要係睇到球隊有控制比賽嘅精神，尤其我哋面對嘅係榜首球隊。」
至於輸波嘅米蘭，跨季27場不敗走勢雖然告一段落，但就好似名帥卡比路賽後話齋，紅黑軍殘陣下面對班底雄厚嘅祖記，絕對輸得唔羞家。而且，隊入面唔少小將嘅進步非常明顯，好似曾經被球迷鬧到想走嘅右閘卡拿比亞，今場頂更防中表現相當唔錯，仲入咗球靚波幫米蘭扳平。米蘭已經宣佈冬季泵水，會有2,000萬歐元（約1.9億港元）增兵，預計會買入一位中堅加強防守，加上伊巴即將復出，祖記10連霸美夢要發得成仲未係十拿九穩。