港股錄得六連捷，下站目標是去年2月反彈高位28000點，以現時牛氣沖天計，達標只係時間問題。
夜晚自家YouTube節目做了簡單調查，發現今年頭兩日戰友贏錢比例高達九成，不少觀眾都問呢隻嗰隻追唔追得；都係嗰句，所有股票都買得，但高追預咗要捱價，同埋走勢不似預期一定要走鬼，最好就係用注碼控制風險，如果接受唔到以上幾樣嘢，奉勸閣下停一停諗一諗。
中國住建部、發改委、銀保監會等十部門，印發關於加強和改進住宅物業管理工作的通知，鼓勵物管企業利用科技提高服務水平，又鼓勵相關企業向養老、託幼等領域伸延，變相多幾個門路搵錢。消息一出，沉寂多時的物管股應聲炒起；從政策角度出發，有強大內房做後盾嘅物管股必定最受惠。恒大物業（6666）上市後炒唔起放棄，碧桂園服務（6098）走勢則靚絕，我自己就向半新股融創服務（1516）埋手，以阿媽融創（1918）規模之大，一定唔會輸蝕。上市時正值物管低潮期，老散已走清，貨源盡落強者手中，走勢如入無人之境。高盛給予目標價25元，回試昨日平均價20.1元分段入場，博高處未算高。
唐牛