上年夏天透過一封傳真而引發一場離隊風波嘅巴塞隆拿前鋒美斯，因為高達七億歐元解約金嘅條款，最後被迫繼續留喺巴塞。早排美斯接受加泰羅尼亞傳媒RAC1嘅訪問中表示有興趣投身美職聯。美斯作為巴塞球會重要象徵，巴塞方面自然唔想佢走，近日有位新一屆會長候選人提出重啟喺美職聯加入自己球隊嘅計劃，實行搞隊波畀美斯過去美國踢。
已經33歲嘅球王美斯，自從2004年開始為巴塞1隊首次上陣之後，雖然一直同其他大球會有過轉會傳聞，不過美斯一直都選擇留效巴塞，但由於同巴塞嘅合約將會喺今夏到期，所以踏入2021年，美斯已經可以自行同任何球會傾，等到夏天同巴塞份約一完，就可以自由身離開巴塞。美斯之前受訪時就透露過，自己希望喺球員生涯尾段去美職聯搵食，會去邊就眾說紛紜，其中有傳過由碧咸做班主嘅國際邁阿密非常有興趣簽美斯。加上美斯原來一早已經喺美國邁阿密買入一個豪宅單位，證明美斯的確有機會成為國際邁阿密嘅一員。
但作為巴塞一直以嚟嘅當家球星，球會又點會咁輕易放走美斯。西班牙《阿斯報》就指出，早喺2008年就打算以邁阿密作為據點進軍美職嘅巴塞，雖然當時計劃無疾而終，但近期巴塞會長候選人之一嘅域拿祖亞拿就打算將呢一項計劃重啟，用特許經營方式喺美職聯成立另一隊巴塞隆拿，等到美斯有朝一日轉戰美職時候，都可以繼續為巴塞效力，擺明想同國際邁阿密搶人。報道仲話到時候會簽入美斯嘅好朋友蘇亞雷斯，等兩人可以喺美國重聚，希望用呢個理由打動美斯可以效力呢隊由巴塞成立嘅新球隊。
域拿祖亞拿一日未當選，巴塞呢個美職計劃都未必實踐到，所以美斯轉投國際邁阿密嘅機會依然唔細，不過等到美斯決意走人嗰一刻，可能國際邁阿密都未必再係用呢個名。事關意甲球隊國際米蘭喺2014年曾經向美國專利商標局提交「Inter」嘅商標申請，直至上年再向美國專利商標局控告國際邁阿密隊名侵權，禮拜一就喺法庭贏咗首輪訴訟。雖然預計國際邁阿密會提出最後上訴，但假如最終敗訴嘅話，就意味住呢支由碧咸擔任班主嘅球隊要改名。