關嘉敏(Carman)在2015年組成五人女子跳唱組合Bingo,惟發展幾年未見起色,去年因參加《全民造星III》,令性感舞孃形象深入民心。雖然未能打入十強,但賺了人氣和愛情,26歲的她早前被本報爆與細兩年的同組隊員陳澤言(CY)拍拖。身材出眾的她自爆17歲以來拍拖四次,更認為靚仔冇本心。
撰文:祖李
身高173cm的關嘉敏,中學時代經常在港鐵車廂遇上鹹濕佬︰「着校服嗰陣真係好多,記得有次放學搭地鐵,前面個西裝友用個公事包遮住下半身,一路望住我一路搞下面,嗰刻好驚,好彩佢想衝埋嚟嗰刻車門打開,我即刻衝出車廂。仲有一次俾另一個西裝友跟蹤,我驚到走入商場狂兜三個圈,佢唔知係咪嬲得滯,竟然喺我耳邊大聲爆粗。」問這些尷尬經歷會否造成陰影?她說︰「有少少,細個會保守啲,同男仔拍拖會講明唔拖手、唔錫㗎!後來大個就明白要分開睇。」
Carman在17歲開始初戀,拍過四次拖,初戀是渣男,自己糊里糊塗做了第三者,談到這次感情重創,她大嘆︰「佢好渣!但我哋都拖拉咗兩年,拍拖第三個月我就知佢同前度未分手,用佢部電腦溫書時收到佢前度嘅訊息,見到佢哋嘅甜言蜜語同合照,好hurt兼爆喊,事後質問佢,佢認錯我又心軟,但呢次後唔再鍾意靚仔,靚仔冇本心。」
經歷幾次情傷,Carman認為溝通很重要︰「一對男女性格冇可能完全夾,如果對方唔明你或唔顧你感受係冇可能維持,之前有段感情係次次想溝通都嗌交,𠵱家拍拖係感覺行先,然後就睇大家係咪溝通到。」
談到與CY剛萌芽的戀情,Carman拒認二人拍拖,只謂大家有好感︰「其實同佢真係冇嘢,只係覺得溝通幾舒服,會講多啲嘢。」問到大家都是藝人,約會有否避忌?她說︰「唔會,咪做返大家朋友嘅距離。」提到網民祝福及讚兩人合襯,她甜笑開綠燈︰「真㗎?佢係幾好,但完咗比賽大家各有各忙,唔諗住,但有機會發展咪發展囉。」
服裝提供︰D-mop
場地提供︰My Fitness