滔搏（6110）上月宣佈已完成大股東嘅股份分派，當中持股20.2% 嘅管理層及持股16.2%嘅退休管理層已自願承諾進行股份鎖定，市場對呢批股份潛在配股嘅擔憂，較早前嘅股價表現已反映。同業龍頭李寧（2331）及安踏（2020）股價噚日再創新高，滔搏股份創12.44元新後，喺12元水平附近整固，待資金再進場，炒作應可繼續。
自從內地「十四五」規劃落實後，零售及消費內地經濟喺疫情復蘇後嘅核心支柱，滔搏作為國際一級體品品牌嘅最大經銷商，其市佔率足有16%，為行業龍頭。集團喺國內嘅銷售點以萬計，銷售產品組合盡為國際一級品牌。
滔搏早於去年10月底公佈截至8月底止嘅中期業績，收入為157億，按年跌7%；純利則為13億，按年都跌11%，主要係受到上半年疫情打擊所致。不過，集團同一時間宣佈派0.12元人民幣的股息，以及0.40元的特別股息，對股東都算有情有義。
滔搏現價預測市盈率約24倍，遠低於安踏58倍及李寧73倍預測市盈率，雖然滔搏僅為經銷商，相對市盈率應較低，但考慮到滔搏2021下半財年至2022上半財年將實現強勁的銷售和盈利提升，並繼續受惠於內地運動服裝行業的結構性增長，不少大行視滔搏為今年領袖內需股之一。現價買入博炒上14.55元，對應30倍預測市盈率，跌穿11元止蝕，夠晒值博率。
古天后