前青年新政立法會議員梁頌恆，雖然上個月高調宣佈咗流亡美國，𠵱家申請緊政治庇護，但佢喺香港因為欠立法會議員薪津嘅民事案引發嗰單破產案，梗係唔會就咁就完。行管會噚日就同法庭講，已預備好晒文件，要求即時作出頒令。聆案官接納要求，頒令梁頌恆破產。
提返你先，梁頌恆係因為之前嗰單宣誓風波，同游蕙禎一齊被裁定失去議員資格，之後就俾立法會追薪津同營運資金夾埋186萬，兩人缺席聆訊後就輸咗官司，行管會之後連隨呈請埋梁頌恆破產。
不過，單案中間其實都有段小插曲。話說梁頌恆個姑姐好關心呢個姪仔，所有姪仔牽涉嘅官司，佢都想幫手，仲試過申請加入民事案裏面做「第三方」，但就唔成功。噚日朝佢想就住單破產案，交叠文件入法庭，但法庭之前已作出命令唔收佢嘅文件。結果開庭嘅時候，原本坐喺旁聽席嘅梁姑姐企咗起身，但聆案官幾乎冇望過佢一眼，仲話唔會受理文件，宣佈咗頒令後就散庭，剩番梁姑姐企咗喺度。
李八方