昨日政權對民主派初選一鋪過大清算，負責拉50幾人嘅國安處高級警司李桂華會見記者解說，搞個初選投票點樣變成「顛覆國家政權」罪。見李大導咁有信心，向傳媒解釋立法會點可以「顛覆國家政權」，八方以為佢一定好熟書啦，點知一聽之下，原來佢連基本嘅立法會工作、《基本法》內容都講錯晒，唔怪得黃浩銘同網民都話：「只要見李桂華有份出現，你就知道這件案件必會變為業餘、不認真，和像馬戲團。」
警方記者會上，有記者問到搞初選點解係「非法手段」，李大導就話：「根據《基本法》73條，立法會嘅權力同義務係冇呢樣嘢。」先唔講法律冇寫嘅嘢點解就會變咗「非法」，既然要拋書包，《基本法》73條列明嘅係立法會嘅「職權」，而唔係「權力與義務」喎！李Sir係咪以為上緊小學常識課？
佢之後又講到立法會議員對議案嘅否決權，話議員一係投贊成、一係反對、一係「無意見」。八方聽到呢度真係打咗個突，想問吓李桂華，根據立法會投票嘅基本常識，議員選擇只有贊成、反對、棄權，又或者缺席、不按投票掣，幾時多咗個掣叫「無意見」？就算佢唔睇立法會新聞，都睇吓全國人大投票啦，做問卷調查就話有得揀「無意見」啫。
李桂華仲發表「揸車打劫論」，話今次可以比喻揸車係合法，但揸車目的係打劫就有問題。黃浩銘就喺記者會上鬧爆呢個神奇邏輯，恥笑有李桂華出現就真係會變馬戲團。
李八方