馬官做埋今個星期終院首席法官就退休，噚日佢開咗臨別記者會，雖然有少許甩轆，但就掃走佢長期嚴肅嘅形象。除咗搶咪之外，講到有冇北京嘅壓力，仲提返起之前外媒話佢退休想去睇曼聯件事。
唔知係因馬官少見傳媒，定真係好大壓力，佢喺記者會出現幾次「小狀況」。一般記者會主角通常姍姍來遲，但馬官早成個鐘到達會場試咪，似乎慣咗法律界嘅守時時鐘，到記者會開始，新聞官都未講開場白，馬官就急不及待講嘢：「各位朋友，各位傳媒朋友……」之後醒覺搶咗主持個咪，即刻尷尬一笑，交返個場畀新聞主任，會後佢仲同記者嚟個大合照，相信平日馬官一定唔會。
成場記者會，馬官講咗成粒鐘，都係圍繞法治、司法獨立冇受壓等等，但問到馬官自己嘅打算，佢話都唔係好知，問到佢有冇壓力，馬官就忍唔住透露佢曼聯球迷嘅身份，佢話政府同內地朋友、法官冇畀壓力佢，可能有人覺得同大陸法官傾會好攰，所以佢唔鍾意講法律嗰啲問題，寧願講曼聯，或者傾第二啲嘢，但其實唔係嘅。
其實馬官係回應緊上年4月，路透社有關三法官指北京扼殺香港司法獨立嘅報道，入面講馬官厭倦向中共黨員解釋三權分立，寧願同佢哋討論足球，又話佢渴望休息，想擺多啲時間喺佢嘅興趣，例如睇曼聯喎，估唔到佢退休先曲線回應自揭佢曼聯粉絲身份。記者會結束後，本身是英超曼聯球迷嘅馬道立先放鬆講講笑，話自己非曼聯不看，又豎起手指公說：「利物浦輸波，好。」馬官應該講緊前晚利物浦作客以0比1輸畀修咸頓，令曼聯上英超榜首機會又大咗！
李八方