立法會體育、演藝、文化及出版界議員馬逢國，噚日喺政制事務委員會上話要為印刷界朋友爭取選民資格，點知政制局常秘鄧忍光回咗一句話說，就激到馬逢國大鬧鄧忍光「污辱」咗個界別，即刻好嬲好嬲。係呀，「污辱」咗你呀馬逢國，咁點呀？
是咁的，馬逢國話有位印刷界朋友，有幾百間公司，想喺出版界有返個投票權，講咗六屆選舉政府都唔理，真係「講到條脷都起枕」。講到牙骹都甩就聽過，脷起枕真係唔知點。同時馬逢國又埋怨，去年押後咗嘅立法會選舉中，有人利用「漏洞」，唔使一年就攞到業界資格做選民，有選民投訴政府又唔理。
鄧忍光覆馬逢國話，其實回歸初期，係印刷界自己揀去保險界嘅，可能𠵱家覺得唔適合啦。馬逢國聽到呢度就插口喪鬧鄧忍光「污辱咗個界別」，仲要鄧忍光收回言論，不過冇人理佢；而政制局長曾國衞就打圓場話會返去認真審視，被「污辱」咗嘅馬逢國就冇再出聲。其實新聞界都係馬逢國選民，又唔見佢幫手爭取吓選民福利，不過佢淨係畀記者喺立法會食飯已經皇恩浩蕩㗎喇。
李八方