43歲商台DJ謝茜嘉（嘉姐）前晚在社交網宣佈成為人妻，婚禮將於明日舉行，她指因疫情關係不會擺酒：「致鄉親父老，各路友好：我結婚啦！疫情關係，今鋪堅係招呼唔到，唔打搞大家，平安至上，你們的祝福全在心中，而且非常感動！我丈夫係摩洛哥人，溝通方法主要係用英文同身體語言（呢個必然啦），不過佢本人係講法文同埋個姓氏係阿拉伯文，Annouhi（直譯：阿嚕嘻），所以從此喜歡的話可以叫我『阿太！』」
謝茜嘉特別上載姪女親手製作的結婚卡，大讚禮薄但情很重，鄭秀文及謝安琪等留言祝福。《蘋果》聯絡謝茜嘉恭喜，她表示：「疫情好啲先再返摩洛哥擺酒。老公屋企做建築材料生意，婚後會兩邊飛。」