上星期名采作者古德明寫咗幾日孫文風流史，以21世紀標準，孫文會係所謂「十一哥」、性騷擾、性侵犯、孌童，樣樣齊，會似特朗普、克林頓朋友Epstein咁樣臨老入監倉，一生名譽掃地。以19世紀標準，男人大晒，名士風流，女士唔咁講，男人話佢識嘆。絕世科學家愛因斯坦咪又係一生「女人殺手」，對第一任妻子不義，對第二任妻子不忠，私人「愛情生活」一塌糊塗。不過咁，愛因斯坦在科學研究方面卻非常平權，對同時代女科學家十分尊重，並不如其他男性科學家咁樣排擠女科學家。
古德明講孫文「溝女史」，好睇過連載小說，一位老友睇到眉飛色舞，日日追，卒之佢問：「點解古德明唔用慣常名字孫中山，而用孫文呢？我有不少朋友在中山有別墅，放親假就返去中山吃喝嘅啦！」
呢樣要問吓古校友，不過大家都知道孫中山，係孫文在日本活動時期嘅名字，中山日本名叫Nakayama，姓孫在日本叫做Son，與Sun英文發音相同，日本首富孫正義個「孫」，就係Son，一如熱刺前鋒孫興民（摩連奴叫佢做Sonny），呢兩位姓孫名人都係韓國裔。中山原名香山，當年國民政府不理會孫中山之「中山」名字來源，就將香山縣改名為中山縣，以示紀念孫文。日本人或者會覺得滑稽，點解中國廣東省會有一個Nakayama County也。今日內地咁多五毛小粉紅網民，點解無人提議將中山縣正名為香山縣呢？
亦有老友認為古德明抹黑國父好唔應該，畢竟孫文努力奔走海外，搵華僑及外國勢力（主要是日本）捐錢搞革命，違反大清帝國法紀（當時未有國安法）推翻滿清，建立共和國有大功勞也，私人性生活係佢嘅事，於一生功績無損，老毛對中國共產黨有絕大功勞，對中國人民性命有絕大傷害，一生咪又係玩女無數。搞政治鬥爭，搞革命嘅人，絕不會是聖人，中國傳統歷史係勝利者寫的，對先王，對朝代創始人總是隱惡揚善，只講功德，敗壞風紀之事不提一筆。依家21世紀咯喎，社交媒體多如天上繁星，二打六都可以做YouTuber、KOL，秘而不宣之事只會在威權主義國家才有。古德明罵孫文，讓大家知道歷史不只一種寫法，好事也。不過若果考DSE出一條題目：試論孫文之一生功過，恐怕又會畀楊潤雄蔡若蓮DQ。