【姐匙Talk】金金風流專吼女拍檔

娛樂圈藝人感情生活出名亂七八糟，多角戀、瞞另一半偷食嘅新聞時有聽聞，就好似好耐冇蒲頭嘅「金金」，本身嘅情史已知都超過10隻手指，至於外界唔知嘅戀情，相信手指加埋腳趾都唔夠數。最近金金出返嚟同大家見面，無可避免外界又開始勾起佢過往嘅風流史。

請假避兩女同場

話說金金拍親劇，由於太過投入，好容易會同對手發生真感情，而呢件事就發生喺十年前，佢試過背住正印女友，同劇中女主角「公主」發展感情，由於金金女友係圈外人，所以佢可以攞正牌同公主喺拍攝現場鬼混，其實公主都係受害者，事關金金對佢講過係單身，就係咁，公主懵盛盛做咗第三者都唔知。

劇組有次去內地拍外景，正印女友收到風，連夜趕去現場，同樣收到風嘅金金，原來早有準備，預先同導演講唔舒服話要請假一日，留喺酒店等女友嚟，此舉既可以瞞住女友，又可以瞞埋新歡，繼續享受齊人之福，難怪金金有橋王之稱。

撰文：Jessie

本欄逢周三刊出

姐匙Talk

我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。