踏入2021年，先祝各位讀者早日達到財務自由！踏入新一年，不如估一估黑天鵝。
去年黑天鵝大家都知道一定是武漢肺炎，雖然令股市在三月大跌，但埋單計數，即使表現削如恒指，埋單都只是跌3%左右，創新高的美股不用說，埋單仍有升幅，拜的都是全球央行放水所賜。當市場最恐懼的時侯，美國聯儲局率先將錢誘導至股票市場，之後更出手買ETF，間接造就美股造出疫市神話，經過放水超過十年，大家都知錢放銀行甚至債券都無錢途，股市變成唯一出路，今年更有分析預期股市（尤其是港股）將會爆升，因為港股去年都無乜升過。
不過，去年底（即是個多星期前）有個消息令筆者比較在意，美國投資者孖展額度創新高，投資者情緒高漲到不惜借孖展去買股，大家都不相信在經濟未回穩之下，央行會收水，情況繼續落去的話，投資者會經不起考驗，央行未必需要閂水喉，只需要略為減少買債，股市分分鐘人踩人，這可能會是今年股市的黑天鵝，港股去年表現出不跟升的一面，最怕今年會跟跌。
散子