被中共全球公開通緝，2019年反送中運動籌劃多項抗爭活動嘅連登會員「我要攬炒」（攬炒巴）劉祖廸（Finn），去年流亡英國被「爆頭」襲擊，不過之後不斷有網民質疑事件真偽，亦有網民質疑攬炒巴吞咗眾籌部份資金。攬炒巴噚日決定喺facebook公開「爆頭」傷勢片段回應指控，又批評有網民成日搞「捉鬼」，之前就捉前線鬼，𠵱家就捉國際線鬼。
攬炒巴噚日係fb公開嘅「爆頭」傷勢片，見到佢左眼畀血掩蓋，上衣亦有大量血迹。佢話一直未有公開證據，除咗因條片血腥同當時身份未曝光，仲因為「估唔到香港人可以癲L到，捉鬼捉到無所不用其極」。
除咗遇襲事件，對於網民針對攬炒團隊同分拆出來嘅重光團隊之間賬目問題，質疑攬炒巴吞咗眾籌款項，佢強調自己一個崩都無袋過之餘，啲支出仲係自己倒貼，炮轟一啲網民「之前捉前線鬼，𠵱家就捉國際線鬼，捉X夠未啫？」
八方之後再搵攬炒巴，佢話一直有來歷不明嘅人喺連登抹黑佢，佢一直都忍，希望清者自清，但近日抹黑風潮漸漸蔓延，認為對方得寸進尺，所以決定發文正式澄清，仲話連登仔都係香港人，任何同路人嘅支持都重要，佢唔想越來越多同路人信以為真。
李八方