一位深藍老友(識咗近30年)來短訊講本欄指內地打壓馬雲,佢話:「你有冇聽過馬雲的牙擦演講呢!他嘲笑現在的金融制度及巴塞爾協定,提醒了王岐山,原來螞蟻是靠無抵押貸款給淘寶買家而膨脹的,賺晒利息仲厲害過財務公司。現在不是打壓,是要規範化,保障債仔不能過度借貸花錢。」
即係咁,呢位老友同意馬雲演講惹禍,佢篇演講(10月29日)曾講過,中國當下不是「金融系統性」風險,根本是「缺乏健康系統的風險」,直指今天中國金融沒有一個健康系統。如此講法當然激嬲咗人民銀行、中銀保監、中證監、中國市場監管總局等等頭頭;俗語有云不怕官,最怕管,何物馬雲竟然敢批評中國監管系統沒有健康?由是種下禍根,於是要向馬雲示範甚麼是中國式監管,係咁意調查唔夠兩日就話調查完畢,已足以令阿里巴巴大股東損失慘重,螞蟻金服股東當然已經無法套現。
唔係話中國規管規範化唔得,或者中國要保護小散戶不受高利貸或信貸唔好,實情係,淘寶存在多年,螞蟻亦已由小做到大,上市前估值已過二千億美元,螞蟻申請A+H上市,內地證監會審批開綠燈,准螞蟻上市喎,上市前審查係亂咁嚟㗎?點解在審批階段,唔見提出反壟斷,唔講反高利貸,唔講散戶借貸風險,唔講監管規範化?但在上市前一日,卻突然間發現一切有問題?中證監人員及內地保薦人究竟有冇做過盡職審查㗎?如果有,點解突然一夜之間,打倒昨日的我?如果冇,有關人員是否疏忽,受疏通,雙眼被遮掩,係咁意就簽批文?是但一個原因,都顯示馬雲講得啱,中國風險是沒有健康系統的風險。平時領導人冇講馬雲不是,馬雲做乜都得,突然間習近平、王岐山覺得馬雲有問題,阿里集團就立即變成係一個剝削性壟斷者商業公司,必須受規範,而且不見阿里螞蟻抗辯,只見螞蟻領導人一味表忠全力接受監管規範化,全力配合監管,此乃中式「認錯痛改,自我檢查,接受批評」嘅傳統,唔通夠膽唔寫悔過書咩!微信微博還不時有負面評論馬雲嘅文字出現,與11月前讚嘆馬雲創業/經營之神有別。特朗普好嬲FB,臨走前要展開反壟斷調查,FB有大批律師候命打官司,與馬雲突然神隱差得遠了!